ԻԿՕՄՕՍ/Հայաստան
Հասցե՝ ՀՀ, 0010 Երևան, Հանրապետության փող. 32
Հեռ.` +374 10 52-35-01
Էլ. փոստ՝ Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։
Վեբ-կայք՝ http://www.icomos-armenia.org
ԻԿՕՄՕՍ/Հայաստանը միջազգային ԻԿՕՄՕՍ-ի Հայաստանի ազգային կոմիտեն է: Այն ստեղծվել է 2002թ. հունվարին և արդեն 13 տարի մասնագիտական աշխատանք է իրականացնում ոչ միայն Հայաստանի Հանրապետության, այլ նաև նրա սահմաններից դուրս գտնվող հայկական ժառանգության պահպանության և հանրահռչակման բնագավառում` իր գործունեության առանցքում դնելով միջազգային առաջատար փորձը, օրենսդրական գործիքները և մեթոդոլոգիան: ԻԿՕՄՕՍ/Հայաստանն ունի 74 անհատական անդամներ, որոնցից 12-ը մինչև 30 տարեկան երիտասարդ պրոֆեսիոնալներ են, 16`ը արտասահմանյան անդամներ:
ԻԿՕՄՕՍ/Հայաստանի ջանքերով 2003 թվականից Հայաստանում հատուկ միջոցառումներով և նախաձեռնություններով նշվում է Հուշարձանների և տեսարժան վայրերի միջազգային օրը` ապրիլի 18-ը:
ԻԿՕՄՕՍ/Հայաստանը մասնակցել է ԻԿՕՄՕՍ-ի գերագույն մարմնի` ԻԿՕՄՕՍ-ի 13, 15, 16, 17, 18-րդ Գլխավոր ասամբլեաների աշխատանքներին` համապատասխանաբար 2002 /Մադրիդ, Իսպանիա/, 2005 /Սիան, Չինաստան/, 2008 /Քվեբեկ, Կանադա/ և 2011 /Փարիզ, Ֆրանսիա/, 2014 /Ֆլորենցիա, Իտալիա/ թվականներին: Գլխավոր ասամբլեաներին, որոնք համարվում են ժառանգության պրոֆեսիոնալների ամենամեծ ֆորումները, ԻԿՕՄՕՍ/Հայաստանի կողմից ներկայացվել և ընդունվել են 4 բանաձևեր.
- Վանա լճի Աղթամարի Սբ Խաչ եկեղեցու վերականգնմանը հայ մասնագետների մասնակցության վերաբերյալ /2005թ., Սիան/
- Սահմաններից դուս գտնվող ժառանգությունների վերաբերյալ /2005թ., Սիան/
- Ջուղայի պատմական գերեզմանատան ավերման վերաբերյալ /2008թ., Քվեբեկ/
- Անիի Մայր տաճարի և Ամենափրկիչ եկեղեցու վերականգնողական աշխատանքներին հայ մասնագետների մասնակցության վերաբերյալ /2011թ., Փարիզ/:
ԻԿՕՄՕՍ/Հայաստանի կողմից համակարգվել և ապահովվել է միջազգային ԻԿՕՄՕՍ-ի կողմից 2 տարին մեկ պարբերականությամբ տպագրվող «Վտանգված ժառանգություն» տարեգրքում հայկական ժառանգության վտանգված օրինակների զետեղումը:
ԻԿՕՄՕՍ/Հայաստանի կողմից կազմակերպվել են 2 կարևոր միջազգային գիտաժողովներ, որոնց բոլոր զեկուցումները հրատարակվել են առանձին գրքով.
- «Ավերակ հուշարձանների կոնսերվացման և պահպանության խնդիրները» 2002թ. հոկտեմբեր, Երևան-Բյուրական
- «Հայկական մշակութային ժառանգության պահպանությունը Հայաստանի Հանրապետությունում և արտերկրում», 2008թ. դեկտեմբեր, Երևան-Օշական
ԻԿՕՄՕՍ/Հայաստանի անդամները պարբերաբար ստանում են «ԻԿՕՄՕՍ ԼՐԱՏՈՒ» էլեկտրոնային ամսագիրը և տեղեկացվում պահպանության բնագավառի միջազգային հաջողված փորձին:
2012-2014 թթ. ԻԿՕՄՕՍ/Հայաստանը մասնակցել է ԵՄ Արևելյան գործընկերության ՄՇԱԿՈՒՅԹ ծրագրով Վրաստանում, Ուկրաինայում և Հայաստանում ընթացող «Տարածաշրջանային համագործակցություն հանուն մշակութային ժառանգության զարգացման» նախագծին, որի շրջանակում կազմակերպել է 18 գիտագործնական սեմինարներ դպրոցականների, դպրոցների ուսուցիչների և տեղական ինքնակառավարման մարմինների ներկայացուցիչների համար: Նախագծի շրջանակում նախապատրաստվել է և 2014թ. հրատարակվել է «Պահպանություն հանուն ապագայի» խորագիրը կրող ձեռնարկը` հասցեագրված հանրակրթական դպրոցների ուսուցիչներին:
ԻԿՕՄՕՍ-ի 27 գիտական կոմիտեներից 6-ում ԻԿՕՄՕՍ/Հայաստանն ունի քվեարկության ձայնի իրավունք ունեցող անդամներ:
- «Մշակութային երթուղիներ» կոմիտենում` Նատալյա Գյուլնազարյան
- «Պատմական քաղաքներ և գյուղեր» կոմիտեում` Արտյոմ Գրիգորյան
- «Հուշարձանային վայրերի մեկնաբանում և հանրահռչակում» կոմիտեում` Ֆելիքս Տեր-Մարտիրոսով
- «Ռիսկերի նախապատրաստում» կոմիտեում` Արմեն Ղազարյան
- «20-րդ դարի ժառանգություն» կոմիտեում` Նունե Չիլինգարյան
- «Որմնանկարներ» կոմիտեում` Անի Բաբայան
Վերոնշյալ անձիք, որպես միջազգային փորձագետներ, ուղիղ աշխատում են գիտական կոմիտեների հետ և իրենց նպաստն են բերում ժառանգության պահպանությանը ոչ միայն ազգային, այլ նաև միջազգային մակարդակում:
ԻԿՕՄՕՍ/Հայաստանը տևական համագործակցություն է իրականացնում ինչպես տարբեր երկրներում գործող ԻԿՕՄՕՍ-ի ազգային կոմիտեների, այնպես էլ ԻԿՕՄՕՍ/Թուրքիայի և «Անադոլու կուլտուր» կազմակերպության հետ` Թուրքիայում գտնվող հայկական ժառանգության պահպանության խնդիրների վերաբերյալ:
ԻԿՕՄՕՍ-ի անհատական անդամ կարող են դառնալ 18 տարին լրացած այն անձիք, ովքեր մասնագիտական կամ այլ գործունեությամբ ճանաչված են իրենց բանիմացությամբ՝ հուշարձանների, համալիրների և տեսարժան վայրերի պահպանության ոլորտում: Այդ անձիք կարող են լինել՝ հուշարձանների, համալիրների և տեսարժան վայրերի, կերպարվեստի և հնությունների պետական, ռեգիոնալ կամ տեղական ծառայությունների աշխատակազմի անդամներ /գիտական, տեխնիկական և վարչական/, հուշարձանների, համալիրների և տեսարժան վայրերի պահպանության, վերականգնման, անիմացիայի, օգտագործման և շահագործման բնագավառի մասնագետներ կամ քաղաքականության պատասխանատուներ, ինչպես նաև ճարտարապետության, քաղաքաշինության, արվեստի պատմության, հնագիտության, ազգագրության և վավերագրման մասնագետներ: Կազմակերպությանը կարող է անդամակցել ՀՀ, ինչպես նաև օտարերկրյա ցանկացած քաղաքացի, որն ընդունում է կազմակերպության կանոնադրությունը, նրա նպատակներն ու խնդիրնեը, ցանկանում մասնակցել նրա գործունեությանը և մուծում անդամավճար: Կազմակերպության անդամ դառնալ ցանկացող անձիք կազմակերպության վարչությանը պետք է ներկայացնեն գրավոր դիմում` մուծելով մուտքի վճար, որի չափը և վճարման կարգը սահմանվում է վարչության կողմից: ԻԿՕՄՕՍ-ին անդամակցելու համար վերոնշյալ հմտություններով օժտված անձիք կարող են դիմել ԻԿՕՄՕՍ/Հայաստան հասարակական կազմակերպությանը յուրաքանչյուր տարվա նոյեմբեր-դեկտեմբեր ամիսներին, քանի որ բոլոր անդամների, այդ թվում` նոր դիմողների անվանացանկը թարմացվում և հաստատվում է տարվա վերջին:
Անդամակցության համար կարող եք զանգել +374 10 43-89-53 հեռախոսահամարով կամ գրել Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։ էլ. հասցեին:
Նախագահ` Գագիկ Գյուրջյան
Գործադիր տնօրեն` Տիգրան Բարսեղյան
Գլխավոր քարտուղար` - Գոհար Գևորգյան
Վարչության կազմը
Գագիկ Գյուրջյան
Յուրի Սաֆարյան
Տիգրան Բարսեղյան
Արտյոմ Գրիգորյան
Գրիգոր Նալբանդյան
Մարկո Բրամբիլլա
Արտաշես Ջավադյան
Արփի Վարդանյան
Վերահսկիչ հանձնաժողով
Նախագահ`
Սամվել Մուսոյան
Անդամներ`
Հրանտ Ավետիսյան
Գոհար Գրիգորյան
